Vesvesi (Cytja)
Autori: Abdurahman Ibn Sajir El Auad
Përktheu: Altin Torba
Shtëpia botuese: Mesazhi
Libri që keni në duar është një risi jo vetëm në bibliotekën islame shqiptare, por edhe në atë arabe dhe më gjerë. Ai e pajis lexuesin me një këndvështrim sheriatik dhe mjekësor mbi vesvesin, falë hulumtimit për vesvesin në kontekstin juridik të tij, por edhe në atë mjekësor, të pasuruar me shqyrtime eksperimentale të bëra në terren, të cilat konsistojnë në grumbullim evidencash, analizim të tyre, ekspozë të rezultateve të dala prej tyre dhe diskutim të këtyre rezultateve në dritën e nocioneve sheriatike dhe shkencore. Një studim i dalluar, që mbart brenda tij një notion të saktë mbi vesvesin, në bluarje mendimesh të ardhura prej egos dhe shejtanit por edhe një sëmundje psikike. Gjithashtu ky studim shpalos një përshkrim të nocionit social të vesvesit përmes përcaktimit të këndvështrimit lidhur me burimin që e stimulon vesvesin, efektet e tij, kurimin e tij dhe metodat më të mira për të ndërvepruar me këta faktorë; gjë që shpalos para lexuesit një tablo të kthjellët mbi përcaktimin e simptomave shoqërore të vesvesit. Trajtesë e një rëndësie të veçantë jo vetëm për lexuesin në përgjithësi, por edhe për çdo psikolog dhe specialist musliman të profilizuar në leximin e trajtimit psikik; nëpërmjet së cilës bëhet prezantimi me shumë informacione të vyera rreth fenomenit të vesvesit, të cilat na vijnë në ndihmë në kuadrin e ndërveprimit me personat e prekur prej tij dhe asistimit të tyre. Një subjekt tepër i rëndësishëm për çdo person që lëngon nga vesveset, ku ai do të gjejë informacion shumë të çmuar dhe do të pajiset me porcionin e duhur sheriatik dhe mjekësor, që shërben për kurimin e plotë të vesvesit.
Gjithashtu prej risive që ky libër i dhuron lexuesit është edhe fjalori terminologjik, shtjellimi i qartë i fjalëve të reja, biografia e reduktuar dhe ajo e zgjeruar e personaliteteve të librit si dhe ndriçimi i përmbledhur i ngjarjeve, toponimeve dhe patronimeve historike që ceken në të; gjë që i shtrin horizontet e lexuesit përtej subjektit qendror të librit.
