Helena e epikës sonë tragjikomike 1

Libri: Helena e epikës sonë tragjikomike 1
Autor: Emin Azemi
Redaktor: Resul Shabani
Recenzent: Xhabir Ahmeti
Faqosja: Naser Fera
Shtypi: Focus Print
ISBN: 9786084936015

Këtë parathënie për librin e jashtëzakonshem të Emin Azemit dua ta filloj me thënien se “poeti nuk bëhet, por poeti lindet dhe ai e ka ate shkathtësi e veçori t’i vërejë ato gjëra që të tjerëve s’u bien dot në sy”. Në këtë libër voluminoz me të lexuarit e faqëve të para shihet se Emin Azemi i takon sojit të krijuesve që linden. Syrit të tij nuk i ka shpëtuar asgjë pa vërejtur dhe penës së tij s’i ka shpëtuar asnjë detaj i rëndësishëm pa u shkruar për një ecuri njëzetvjeçare të jetës së këtushme, në radhë të parë të shqiptarëve, por nuk mbetën anash as marrëdheniet ndërmjet vendëve e popujve të Ballkanit e veçmas të politikave të fqinjeve tanë.

Para lexuesit del një libër i cili e ka shpëtuar nga harresa gjithë atë që ka ndodhur në Magedoni, por jo vetëm në të. Aty në të vërtetë përshkruhet në mënyre maestrale jeta jonë me batica e zbatica, me lëvizje anakronike dhe me paradokse të përciella me hijet dhe pehlivanllëqet ballkanike, me zhurmat e një pale dhe heshtjen e palës tjetër, me krekosjen e disave dhe përuljen e të tjerëve. Krahas mugëtirës që e mbulon këtë kohë të përshkruar, librin e përshkon edhe një rreze e theksuar drite. Dhe, kjo dritë ishte puna me përkushtim e autorit, rrëfimi i qartë, doemos edhe mesazhet humane që percjell ai.