Gjurmime albanologjike – Folklor dhe etnologji 38/2008

Libri: Gjurmime albanologjike – Folklor dhe etnologji 38/2008
Botoi: Instituti Albanologjik i Prishtinës
Lektor: Hysen Matoshi
Formati: 17x24cm
Faqe: 360

Ndër këngët e shumta për personalitetet e larta ushtarake dhe civile të Perandorisë Osmane mbizotërojne numërikisht ato që i kushtohen Hasan Riza Pashës, heroit të luftës për mbrojtjen e Shkodrës së rrethuar nga ushtritë serbo-malaziase në vitin 1912. Për këtë figurëinteresante të epikës historike shqiptare dhe për qëndresën e përgjithshme të ushtrisë së rregullt, të asaj vullnetare dhe të popullit të Shkodrës e të rrethinave, në botimet folklorike shqiptare janë botuar deri tash më shumë se 50 kënge.

Në bazë të lëndës folklorike gjeografia e këngëve për Shkodrën në luftë kundër pushtuesve serbë e malazias përfshin pothuajse dy të tretat e mbarë hapësirës kulturore shqiptare. Ato kanë një përhapje të gjerë në shumë vise të Kosovës, midis shqiptarëve në Maqedoni e në Mal të Zi, pastaj në krahinat e Shqipërisë së Veriut, drejt jugut deri në Durrës, në Tiranë e në Elbasan, e në ndonjë rast edhe në Fier, midis mërgimtarëve kosovarë.