Fundamentalizmi i religjioneve të mëdha monoteiste dhe globalizmi

Libri: Fundamentalizmi i religjioneve të mëdha monoteiste dhe globalizmi
Autor: Ferdi Kamberi
Botoi: Logos A
Shtypi: Focus – Shkup
Formati: 14x20cm
Faqe: 270
ISBN: 9789989586101

Ideja e botimit të këtij libri ishte e kamotshme. Fillimisht, me botimin e një shkrimi në disa portale në Kosovë me titull “Fundamentalizmi fetar në kacafytje me pluralizmin fetar”. Më vonë kjo ide zgjerohet në përmbledhjen e një punimi shkencor dhe mbrojtje të titullit master në sociologji në Universitetin e Prishtinës. Por, duke parë që një studim i tillë u ka munguar lexuesve shqiptarë nga ajo kohë, ne kemi berë hulumtime, analiza të tjera, duke e zgjeruar edhe më tej këtë punim.

Ky libër, në fakt, është një përmbledhje shkencore, e ndërthurur me një analizë sociologjike, që trajton një fenomen global i cili ështe në fokus të vetë shoqërisë bashkëkohore. Ndaj, që në fillim duhet cekur se nuk ka qenë e lehtë të elaborohet ky libër. Por, së pari, dëshira dhe motivi psikologjik dhe, së dyti, ofrimi i një pasqyre reale lexuesve mbi fundamentalizmin fetar, (keq) kuptimet, analizat, shkaqet, pasojat e të tjera, na kanë shtyrë drejt një finalizimi të tillë. Andaj, sot kur flitet për fundamentalizmin fetar, si njësi, si koncept, si term, por edhe si fenomen, ai është i ri në bazën e literaturës shkencore, kryesisht në fillimin e shekullit XX.