E kujt është kjo kulturë

Përderisa ndryshimet spektakulare të periudhës së postindustrializimit dhe të globalizimit kanë përshkruar botën dhe kanë provokuar ndryshimin e mënyres së të menduarit edhe për traditën edhe për aktualitetin kulturor e identitar, ndër ne vazhdon mpirja, ngurtësimi në stereotipat e Rilindjes dhe të Romantizmit, por të ngjyrosur me stalinizëm. Shumë tema mbahen tabu, shume rituale përsëriten, ndonëse në realitetin e ndryshuar duken si karikatura.

Për mungesë debatesh të hapta dhe qasjesh kritike, të cilat gradualisht do ta ndryshonin edhe hierarkinë e vlerave artistike e kulturore, vazhdon mitizimi, në njerën anë, dhe denoncimi, në tjetren, të cilat si thikë me dy presa e copëtojnë unitetin kulturor e kombëtar të kombit tonë. E ngurtësuar në stereotipa të prodhuar nga propaganda dhe ideologia, dhe e futur në një proces intensiv komunikimesh me kulturat tjera, në periudhen e integrimeve dhe të globalizimit, kultura shqiptare sot është në udhëkryq, e zënë peng nga historia e saj e deformuar dhe e falsifikuar dhe e palidhur si duhet me të ardhmen e saj.