Akademia Evropiane per Fetva dhe Studime – 1

Libri: Akademia Evropiane per Fetva dhe Studime  1
Autor: Këshilli Europian për Fetva dhe Hulumtime
Përktheu: Bashkim Aliu
RECENZENT: Rufat Sherifi dhe Alifikri Esati
Lektor: Fatmire Ajdini – Hoxha
Korrektor: Agim Abazi
Botoi: Furkan ISM
Shtypi: Furkan Print

Qendra Kulturore Islame në Irlande ka nderin që popullatës islame në përgjithesi, kurse komuniteteve muslimane në Perëndim, në veçanti, t’ia prezentojë numrin e parë të përmbledhjes së fetvave të Akademisë Evropiane për Fetva (decizione) dhe Studime, të cilin e kanë pritur aq shumë muslimanët, për shkak të fetvave dhe zgjidhjeve të cilat i përmban, për shumë probleme me të cilat ballafaqohen muslimanët, e në veçanti ata që jetojnë në Perëndim – në jetën e tyre të përditshme, e sidomos kur dihet se këto fetva janë rezultat i punës dhe përvojës së një elite të dijetarëve të shquar islamë në krye me eruditin e madh, doktor Jusuf el Kardavi, kryetar i kësaj akademie, dijetare këta që jetuan me Librin e All-llahut dhe Sunnetin e Pejgamberit të Tij, Muhammedit (sal-lall-llahu alejhi ve sel-lem], si dhe thesarin e brezit të pare (selefëve), të cilët e përjetuan realitetin e muslimanit që jeton në Perëndim dhe e njohën mirë këtë realitet.

Kështu, me ndihmën e Zotit, u formuluan këto fetva, të mbështetura në argumentet e Kur’anit, Sunnetit dhe mendimet e dijetarëve të mëparshëm, por duke e pasur parasysh çdoherë, siç thotë edhe Ibën el Kajjimi [rahimehull-llah], kohën, vendin dhe gjendjen momentale.